Novo portal sobre accesibilidade e produtos de apoio desde Galicia

A Secretaría Xeral de Política Social oferta este novo recurso que pretende promover redes de cooperación entre as persoas con discapacidade e/ou en situación de dependencia, que precisan de produtos de apoio, e as persoas que os ceden, as empresas, as entidades e os servizos sociais dos concellos.

SERVIZOS QUE OFRECE O PORTAL

-Proceso de consulta, prestación e demanda de produtos de apoio para as persoas usuarias.

-Dispoñibilidade de información de interese xeral: normativa, documentación e guías de boas prácticas.

-Servizo de asesoramento en materia de accesibilidade: preguntas frecuentes (CTA e plataforma) e asesoramento privado e personalizado.

A QUEN VAI DIRIXIDO?

- Persoas que ceden os produtos e persoas demandantes

Rexistro para acceder ao servizo de mensaxería interna de cara a establecer contacto con aquela persoa cedente que teña o produto que interese, xestionándose deste xeito un servizo de axuda de comunicación que pode levar a un préstamo entre as persoas usuarias. A negociación do intercambio será totalmente privada e segura.

- Empresas

Disponse dun apartado destinado ás empresas especializadas na fabricación, deseño e venda de produtos de apoio. Este servizo está dispoñible de balde para toda compañía que queira publicar os seus produtos no catálogo, coa posibilidade de engadir a información que se considere oportuna.

- Entidades

Pódense rexistrar no servizo diferentes actores sociais:

-Servizos sociais dos concellos

-Entidades sociais: publicación de contidos e asesoramento.

-Universidades: publicación de proxectos de investigación.

SERVIZOS SOCIAIS DOS CONCELLOS

A Administración local dos concellos é a máis próxima á veciñanza, e polo tanto, os servizos sociais desta, ocuparán un lugar predominante, facendo de ponte entre o servizo e as demandas da cidadanía.

Desde estes departamentos poderase:

-Recompilar e xestionar as ofertas e as demandas de produtos de apoio no seu concello.

-Buscar información sobre accesibilidade e produtos de apoio

-Usar o servizo de asesoramento dispoñible no portal para consultas concretas da Administración e da cidadanía.

-Publicar información en calquera dos bloques de contido existentes no portal: normativa local, protocolos, ordenanzas etc.

EMPRESAS E ENTIDADES

As empresas poden:

-Difundir os seus produtos dentro do Catálogo de produtos de apoio.

-Responder ás mensaxes que as persoas demandantes fagan sobre os seus produtos.

As entidades poden:

Publicar información en calquera dos bloques de contido existentes no portal: normativa, boas prácticas, documentación, proxectos de investigación, preguntas frecuentes, etc.

ONDE SE PODEN SOLICITAR E OFRECER?

Na plataforma da páxina web: Productos apoio/accesibilidade

MÁIS INFORMACIÓN: no correo electrónico: autonomiapersoal.sxps@xunta.es